علـِّى صوتك

علـِّى صُوتك فى النشيد .. وادِّى تعظيم من حديد
حِب وطنك واملا قلبك .. كل يوم عن يوم يزيد
كل يوم واقفين تمام .. مانتو عارفين النظام
واللا عايزين حد بره .. ييجى تجيبولنا الكلام
هُس خالص ماسمعش صوت .. خلوا يومكم أوام يفوت
واما اخش تقوم قيام  .. وانتباه وقت السلام
مش كفاية كتير عددكم .. زحمة جداً فى الفصول 
بس كان مالى ومالكم .. ده التعب أصبح مهول
علـِّى صُوتك فى النشيد .. وادِّى تعظيم من حديد
حِب وطنك واملا قلبك .. كل يوم عن يوم يزيد
مش كفاية الحصة خالص .. وقت ضيق فصل هايص
ياللى غاويين المدارس .. ياللا بينا مجموعات
كله يدخل ياللا إما .. درس خاص مشروح بذمة
جوة بيتك لم لمَّة .. والمناهج  بالساعات
ياللى غاويين السكات .. كل حتة فيها انفلات
كل يوم نفس الحاجات .. والنهارده ايه الجديد   علـِّى صُوتك فى النشيد .. وادِّى تعظيم من حديد 
حِب وطنك واملا قلبك .. كل يوم عن يوم يزيد
النهاردة حصصنا نشاط .. كله يلعب كله انبساط
أصل استاذ الحساب .. النهاردة ياولاد غياب 
واللغة العربية أجازة .. والعلوم غايبة الأستاذة  
يوم رياضى حلو جداً.. ياللا بينا أحسن شباب
والملاعب حلوة بيكم .. مدرسة ولا يوم العيد
على صوتك فى النشيد .. وادى تعظيم من حديد
حب وطنك واملا قلبك .. كل يوم عن يوم يزيد
-------------------------------------
وللحكاية حكايات كتييييييييييييييير
أحــــــمد ثابــــــــت