الوقت قدامنا

بسم كل ام بسم كل اب

 ضاع منهم املهم ولا كانش ليهم ذنب

بسم كل شهيد لسة روحه اكيد

ف كل واحد فينا مابقتش حاجة بعيد

بسم كل اخ بسم كل اخت

 راح منهم سندهم ولا كانش ليهم بخت

بسم كل الناس لو لسة فيه احساس

 ورينا حكم ربك حقق لينا القصاص

بسم كل واحد فتح عيونه راحت

 برىء كان كل ذنبه للحق عيونه شافت

بسم كل القلوب ياقلوب زى الحجر

 ياضمير قساوته طوب وصفات غير البشر

بسم الاله والدين ع الخونة والملاعين

 ياعيون عامية وغشيمة ياعقول كما الضالين

بابعت اليكم رسالة انا صوت كل اللى فات

 يمكن يحوق فيكم يانظام ضميره مات

خلوا اللى فاضل لينا من عمرنا وأمانينا

 نبنيه بقى بايدينا وايدين كل الولاد

وابعت لاهلى وصية هاكتبها م الوقتى

 يمكن يعدى عليا انا دورى دلوقتى

وتشوفنى امى شهيد وانا جايلها بزفة

وكأنى لسة وليد ملفوف بكام لفة

بحنان مدت ايديها وف حضنها خدتنى

 م الفرحة اللى ف عنيها سال دمعها ف حضنى

نادت بعلو الصوت عمر الشهيد مايموت

 موجود فى كل ولادى ولا يوم ياولدى تموت

اما انتوا لسة عبيد والاسم حكامنا

 عايشين بأمر السيد ودفنتوا أحلامنا

 فاكرينها لسة بعيدوالموت مالوش مواعيد 
ده عمركم بيزيد والوقت قدامنا

الوقت قدامنا … والوقت قدامنا

----------------------------

من كلماتى

أحمد ثابت