( أروح مدرستى ) أوبريت للأطفال

بكرة المدرسة .. ودا أول يوم .. مستنياه .. وماجايليش نوم

لابسة المريلة .. لابسة البابيون .. وف شنطتى قلمى وكراستى
باحلم وأنا صاحية بمدرستى

بأحلم وأنا صاحية بأول يوم .. والشنطة واخداها ف حضني 
سهرانة معاها ومافيش نوم .. عايزة اشبع منها وبراحتي 

كل شوية أفضي الشنطة .. ألعب وأرتب أدواتي 
على طرابيزتي الحلوة السمرا .. وأرجعها في شنطتي تاني 

وأكلم أدواتي في سري .. وتكلمني كمان وتقولي

أهلاً بيكِ وفرصة سعيدة .. نتمنالك دنيا جديدة
وف سنة أولى تبقي الأولى .. وسط زمايلك حاجة أكيدة

متشكرة جداً ياحاجاتي .. أتمنالكم تملوا حياتي
ولايقصف سـِنك يوم قلمي .. واكتب علمي وارسم علمي 

شكراً ( منَّة ) شكراً جداً .. بنت جميلة مؤدبة جداً
كان نفسنا نفضل وياكِ .. بكرة تجيبي زينا واحسن 

مش ممكن أبداً أغيركم .. دا انتوا حياتي و ماليش غيركم
بُص ياقلمي  لـِيك مش هابرى .. ويَاكراستى هاصغر خطي 

باتمنالكوا إقامة سعيدة .. تبقوا معايا لفترة بعيدة 

شكراً ( منَّة ) شكراً جداً .. بنت جميلة مؤدبة جداً
كان نفسنا نفضل وياكِ .. بس الوقت اتأخر جداً

حاضر طب تصبحوا على خير

نتمنالك حلم جميل

أهلاً بيكِ وسط الزملا 
أحمد .. أيمن ..نانسي وزهرة .. إسمـِك ايه؟

أنا ( منَّة ) والأصل منارأنا شاطرة أهلاً شطار 

ياللا تعالوا بسرعة طابور .. وقفتنا هنا هو على طول 

جرس الحصة الأولى بدأ .. في نظام ياللا على الفصول 

أهلاً مرحب ياااا .. سنة أولى
بصوا معايا على السبورة 

ألفٌ أرنب يجري ويلعب . باءٌ بطة تمشي فتتعب 

تاءٌ تمرة سليمة وسمرا .. ثاءٌ ثعلب عمره مايغلب 

ياللا يا ( منَّة ) قولي ورايا 

ياللا يامنــَّة .. قومي من نومك
ينفع كده .. نايمة بهدومك

لسة ياماما ...

ياللا يابنتي  اتأخرتي .. الباص أهو واقف من بدري
إغسلى وشك ياللا وفوقي .. من أولها تطلعي روحي 

يانهار أبيض هو أنا لسة .. فين الميس وفين الحصة
يعني ياماما كان كل دا حلم .. عايشة انا فيه وكأنه حقيقة 

بيب بيب ياللا يا ( منَّة ) .. حاضر لحظة قدامي دقيقة

باتمنالكم سنة دراسية سعيدة 
-----------------

أحمد ثابت رضوان