قــلــب واحـــــد
أنا واحد من تلاتة
عايشين بقلب واحد
حبيتك بالتلاتة
وياريت أنا وانتِ واحد
أولنا مشغول بيكِ
وازاى بس تحسيه
نفسه فى مرة يلاقيكى
تقرى شوقه فى عينيه
عاش ياما فى عز الليل
وحدانى وليله طويل
ازاى يشغل فى عنيكِ
ويخلى القلب يميل
وتانينا الله فى عونه
عاشق ولهان ولونه
مخطوف لما تناديله
بشفايفك النونو
عايش مع نفسه خيال
بيذاكر اللى هايتقال
ولما يشوف عينيك ِ
يتغير كل الحال
وتالتنا بتحبيه
مشغولة ومجنونة بيه
وأول ماتناديه
يلاقيكِ خيال فى خيال
معذور ماهو عاش وحدانى
شايفك بس فى أحلامه
يتمنى تكونى حقيقى
والحلم يبان قدامه
وأنا ليكِ كل التلاتة
لكن القلب واحد
حبيتك بالتلاتة
وياريت أنا وانتِ واحد
----------------------
تحياتى
أحمد ثابت
تعليقات
إرسال تعليق